Circolo Culturale Ca de Puio

PUIÖ D’INA VOTTA

Composizione in versi nella parlata di Poiolo scritta da Maria Luisa Armondo,
pubblicata in A Vuxe de Cà de Puiö, n. 1, luglio 1982, pp. 4-6.

In ta burgà de Puiö u ghe viveva tanta gente
...sula o cun a famija e i se faxeva bona cunpagnia.
De Arimundu u ghe n’ea de tante razze,
...chi ghe piaxeva gïà u mundu e chi e ciasse.
Me pâe-grande, Meneghìn, de survanomme “u Cusìn”
...u l’ea caegà e u andaxeva a auxelà.
Me mâe-grande, Custansina, a puntava senpre u scusà,
...perché in ta stacca a g’axeva u ruzàiu, i mentìn e a buetta pe prezà.
U sciù Tumaxìn, u so vixìn de cà,
...u l’ea segretàiu e u l’è stàitu pudestà.
So sö, a maistra Custansina, a l’ea tantu beghina,
...cui amixi e cui paènti tutta cunprimenti.
I Canelli pe pià cunséji e registrà i atti
...i l’ea senpre dai avucatti.
Bacì-Bacì u l’axeva senpre da dì, u l’ea tantu cuiùzu
...c’u rendeva fina nuiùzu.
A Buzza e a sö Ninìn i parluttava senpre cianìn,
...i staxeva a petelà finché a pignatta a nu l’ea bruxà.
Mitirde de l’Aju a l’ea da travaju,
...de giurnu a segava e de seia a fïava.
Miché-Miché u l’ea tantu avàu
...che pe cattà a sasissa u andaxeva a Burgumà.
So fìu Pepìn u l’ea beccamortu
...e a tenpu persu u cüâva l’ortu.
U Varese u paxeva curteze,
...ma cu so modu de fà a fìa a nu l’à maià.
A Vitturina, ina pòvea crista,
...a se credeva artista e a vuxeva recità.
Gigatta, u mersà,
...u vendeva brichetti, stringhe e picàia de scusà.
In ta cà cun a scaa de fèru u ghe staxeva a Miglia e Virginia,
...travaja ti che a travaju mi,
...tantu a l’ea a festa cumme l’auveì.
Me mâe-grande, a Gigina, povea donna! in canpagna,
...in ta stalla e in cuxina a l’ea senpre inpegnà,
...a cüàva i maòtti, i veggi, i fiöi
...e a truvava anche u tenpu de fa i raviöi.
Me pâe-grande, Bröxìn de Ciletta,
...u purtava a barì in ta Valletta,
...u l’axeva u vissiu de penà
...e s’u truvava da lezze u se scurdava de mangià.
Carlìn e Giuanollu de Pepina i l’ea da Riva,
...ma i l’ea stàiti in Argentina,
...tütti quelli chi l’an navigau
...i dixeva che in paize bellu, ma bellu cumme Puiö,
...i nu l’an mai truvàu.
U pussu de Cinciùn u l’ea famuzu e Ciletta urgugliuzu
...che tütta a burgà andesse a pià l’aigua là.
I giurni de travaju i mangiava suppe d’aju,
...landaòtti, cundiùn e menestrùn.
Ae feste grandi a l’ea sasissa, raviöi
...e pe duse gasse e frixöi.
U pan i su faxeva in cà,
...cun e stesse legne i cöxeva un’autra furnà,
...turta verde, mignagnàu e fainà.
Ae matin d’estei i se vestiva prestu,
...au doppu-gernà i staxeva au frescu,
...pöi i andaxeva in canpagna a inaiguà e a segà.
Chi ossi de pèrsegu i faxeva u turùn,
...u casciùn de fighe secche i u vertiva a Cuncessiùn
...e da u suà i chinava e amàndue e i nespui
...che in ta paja i meteva a maüà.
E funsiùn in ta capella, quattro votte all’annu:
...S. Giuvanni de Galassu, S. Anna, Cuncessiùn
...e da S. Bartumé in prescisciùn i g’andaxeva a fa e rugasiùn.
Bè! U l’è tardi, a stoia de tütti a nu possu cuntala,
...a diggu sulu ch’i viveva cuntenti e i se vuxeva ben,
...che se u vixìn u nu ghe l’axeva i ghe purtava anche u fen.
Sti veggi che l’an vivìu lasciü aùa nu ghe n’è ciü
...e nui a se purtammu in tu cö i tristi e i belli regordi de Puiö.

.......................................... Maria Luisa Arimondo